ದಿನಾಂಕ:21-09-2026(ಹಾಯ್ ಉಡುಪಿ ನ್ಯೂಸ್)ನವದೆಹಲಿ: ದಕ್ಷಿಣ ಕನ್ನಡದ ಧರ್ಮಸ್ಥಳದ ಸೌಜನ್ಯಾ ಅತ್ಯಾಚಾರ–ಕೊಲೆ ಪ್ರಕರಣ ಮತ್ತೊಮ್ಮೆ ರಾಷ್ಟ್ರಮಟ್ಟದ ಗಮನ ಸೆಳೆದಿದೆ. 2012ರಲ್ಲಿ 17 ವರ್ಷದ ಸೌಜನ್ಯಾ ಸಾವಿನ ಬಳಿಕ ಆರಂಭವಾದ ನ್ಯಾಯದ ಹೋರಾಟ, ವರ್ಷಗಳ ಕಾಲ ಪ್ರತಿಭಟನೆ, ಸಾರ್ವಜನಿಕ ಅಭಿಯಾನ, ಸಾಮಾಜಿಕ ಜಾಲತಾಣಗಳ ಚರ್ಚೆ ಮತ್ತು ನ್ಯಾಯಾಲಯದ ಮೆಟ್ಟಿಲುಗಳನ್ನು ದಾಟಿ ಇದೀಗ ಸುಪ್ರೀಂ ಕೋರ್ಟ್ನ ಮಹತ್ವದ ಆದೇಶದ ಹಂತ ತಲುಪಿದೆ.
ನವದೆಹಲಿ: ದಕ್ಷಿಣ ಕನ್ನಡದ ಧರ್ಮಸ್ಥಳದ ಸೌಜನ್ಯಾ ಅತ್ಯಾಚಾರ–ಕೊಲೆ ಪ್ರಕರಣ ಮತ್ತೊಮ್ಮೆ ರಾಷ್ಟ್ರಮಟ್ಟದ ಗಮನ ಸೆಳೆದಿದೆ. 2012ರಲ್ಲಿ 17 ವರ್ಷದ ಸೌಜನ್ಯಾ ಸಾವಿನ ಬಳಿಕ ಆರಂಭವಾದ ನ್ಯಾಯದ ಹೋರಾಟ, ವರ್ಷಗಳ ಕಾಲ ಪ್ರತಿಭಟನೆ, ಸಾರ್ವಜನಿಕ ಅಭಿಯಾನ, ಸಾಮಾಜಿಕ ಜಾಲತಾಣಗಳ ಚರ್ಚೆ ಮತ್ತು ನ್ಯಾಯಾಲಯದ ಮೆಟ್ಟಿಲುಗಳನ್ನು ದಾಟಿ ಇದೀಗ ಸುಪ್ರೀಂ ಕೋರ್ಟ್ನ ಮಹತ್ವದ ಆದೇಶದ ಹಂತ ತಲುಪಿದೆ.
ಪ್ರಕರಣದ ತನಿಖೆಯನ್ನು ಸಿಬಿಐ ನಡೆಸಿದ್ದು, ಆರೋಪಿ ಸಂತೋಷ್ ರಾವ್ ನನ್ನು 2023ರಲ್ಲಿ ಸಿಬಿಐ ನ್ಯಾಯಾಲಯ ಖುಲಾಸೆಗೊಳಿಸಿತ್ತು. ಇದಾದ ಬಳಿಕವೂ ಸೌಜನ್ಯಾ ತಾಯಿ ಕುಸುಮಾವತಿ ಗೌಡ ಅವರು ಮರುತನಿಖೆಗೆ ಒತ್ತಾಯಿಸುತ್ತಲೇ ಬಂದಿದ್ದರು. ಹೈಕೋರ್ಟ್ನಲ್ಲಿ ಸಲ್ಲಿಸಿದ್ದ ಅರ್ಜಿ ವಜಾಗೊಂಡ ಬಳಿಕ ಅವರು ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿದ್ದರು.
ಈ ನಡುವೆ ‘ಕೊಂದವರು ಯಾರು?’ ಸೇರಿದಂತೆ ವಿವಿಧ ನಾಗರಿಕ ಅಭಿಯಾನಗಳು, ಪ್ರತಿಭಟನೆಗಳು ಹಾಗೂ ಡಿಜಿಟಲ್ ಕ್ಯಾಂಪೇನ್ಗಳ ಮೂಲಕ ಪ್ರಕರಣವನ್ನು ಮತ್ತೆ ಸಾರ್ವಜನಿಕ ಚರ್ಚೆಯ ಕೇಂದ್ರಕ್ಕೆ ತರಲಾಯಿತು. 2026ರಲ್ಲೂ ಕಾರ್ಯಕರ್ತರು ಮತ್ತು ಕುಟುಂಬದ ಬೆಂಬಲಿಗರು ತನಿಖೆಯ ಪ್ರಗತಿ ಹಾಗೂ ಉತ್ತರದಾಯಿತ್ವದ ಬಗ್ಗೆ ಪ್ರಶ್ನೆಗಳನ್ನು ಮುಂದುವರಿಸಿದ್ದರು.
ಇದೀಗ ಸೆ.21ರಂದು ಸುಪ್ರೀಂ ಕೋರ್ಟ್ ಮಹತ್ವದ ಹೆಜ್ಜೆ ಇಟ್ಟಿದೆ. ಸೌಜನ್ಯಾ ಪ್ರಕರಣದ ಮರುತನಿಖೆಗೆ ಆದೇಶಿಸಿರುವ ಕೋರ್ಟ್, ಮೂರು ತಿಂಗಳೊಳಗೆ ತನಿಖೆಯ ಕುರಿತು ವರದಿ ಸಲ್ಲಿಸುವಂತೆ ಸೂಚಿಸಿದೆ. ಈ ಬೆಳವಣಿಗೆಯಿಂದ ವರ್ಷಗಳಿಂದ ಉತ್ತರಕ್ಕಾಗಿ ಕಾಯುತ್ತಿರುವ ಸೌಜನ್ಯಾ ಕುಟುಂಬದ ಹೋರಾಟಕ್ಕೆ ಮತ್ತೊಂದು ಕಾನೂನು ತಿರುವು ಸಿಕ್ಕಿದೆ.
ಹಿಂದಿನ ತನಿಖೆಯ ವಿಧಾನಗಳ ಕುರಿತು ವಿಚಾರಣೆ ವೇಳೆ ಸುಪ್ರೀಂ ಕೋರ್ಟ್ ಪ್ರಶ್ನೆಗಳನ್ನು ಎತ್ತಿತ್ತು. ತನಿಖಾಧಿಕಾರಿ ಹಿಂದಿನ ತನಿಖೆಯಲ್ಲಿದ್ದ ಸಾಕ್ಷ್ಯಗಳನ್ನೇ ಆಧರಿಸಿದ್ದಾರೆಯೇ, ಸ್ವತಂತ್ರವಾಗಿ ತನಿಖೆ ನಡೆದಿದೆಯೇ ಎಂಬ ವಿಚಾರವೂ ನ್ಯಾಯಾಲಯದ ಗಮನಕ್ಕೆ ಬಂದಿತ್ತು. ಇದೇ ಹಿನ್ನೆಲೆಯಲ್ಲಿ ಈಗ ಹೊಸದಾಗಿ ತನಿಖೆ ನಡೆಯಲಿದೆ.
ಧರ್ಮಸ್ಥಳದ ನೆಲದಲ್ಲಿ ಆರಂಭವಾದ ಸೌಜನ್ಯ ಕುಟುಂಬದ ನ್ಯಾಯದ ಹೋರಾಟ, ವರ್ಷಗಳ ಕಾಲ ಕರ್ನಾಟಕದ ಬೀದಿ ಹೋರಾಟದಿಂದ ಸಾಮಾಜಿಕ ಜಾಲತಾಣಗಳ ಚರ್ಚೆಯವರೆಗೆ ಸಾಗಿದೆ. ಈಗ ಸುಪ್ರೀಂ ಕೋರ್ಟ್ ಆದೇಶದ ಬಳಿಕ ಹೊಸ ತನಿಖೆ ಯಾವ ದಿಕ್ಕಿನಲ್ಲಿ ಸಾಗಲಿದೆ? ಹಿಂದಿನ ತನಿಖೆಯಲ್ಲಿ ಉಳಿದ ಪ್ರಶ್ನೆಗಳಿಗೆ ಉತ್ತರ ಸಿಗಲಿದೆಯೇ? ಎಂಬ ಕುತೂಹಲ ಮತ್ತೆ ಮೂಡಿದೆ.
ಆದರೆ ತನಿಖೆ ಪೂರ್ಣಗೊಳ್ಳುವವರೆಗೆ ಯಾವುದೇ ವ್ಯಕ್ತಿ ಅಥವಾ ಸಂಸ್ಥೆಯ ವಿರುದ್ಧದ ಆರೋಪಗಳನ್ನು ಅಂತಿಮ ಸತ್ಯವೆಂದು ಪರಿಗಣಿಸಲಾಗದು. ಈಗ ನಿರೀಕ್ಷೆ ಇರುವುದು ಹೊಸ ತನಿಖೆಯ ಫಲಿತಾಂಶದ ಮೇಲೆ.
14 ವರ್ಷಗಳ ಹೋರಾಟದ ಬಳಿಕ ಪ್ರಕರಣ ಮತ್ತೆ ತನಿಖೆಯ ಹಾದಿಗೆ ಬಂದಿದೆ.ಸೌಜನ್ಯಳ ಸಾವಿಗೆ ಈ ಬಾರಿ ನ್ಯಾಯ ಸಿಗಬಹುದೇ?